Siglir tar il cuntegn

Header

Armon Schlegel ed Anna Caprez durant lur spassegiadas a l’ExpoMilano.
Legenda: Armon Schlegel ed Anna Caprez durant lur spassegiadas a l’ExpoMilano. RTR, A. Caprez
cuntegn

Expo Milano 2015 Il diari: 06.05.2015

La redactura da radio Anna Caprez ed il redactur da televisiun Armon Schlegel tradeschan mintga di dapli da lur mintgadi.

Bleras persunas a la staziun da Rho Fiera a Milano.
Legenda: Las massas da glieud a la staziun da Rho Fiera daventan adina pli grondas. RTR, A. Caprez

Senza gronds incaps essan nus rivads questa giada sin l’areal da l’ExpoMilano. Plaun plaunet sa disan tuts in vid l’auter, ed han er gia ina tscherta rutina tar las controllas. Davant l’entrada spetgavan però uschè bleras persunas sco anc mai sin l’avertura uffiziala a las 10.

I vegn adina pli chaud ...

Entant che Anna è ida en tschertga da persunas che la cusseglian co ir enturn cun las chaliras, lavura Armon en ses biroïn climatisà. Anna ha tschertgà respostas en pavigliuns ch’èn usitads cun las chalurs, vul dir tar il Maroc ed il Catar. Il problem principal n’eran betg las temperaturas mabain la communicaziun. U ch’ils preschents na savevan betg la lingua, u che quels n’ avevan betg l'autorisaziun per discurrer cun schurnalists. Finalmain ha ella però tuttina chattà persunas che han tradì in u l’auter secret:

In beduin davos il pavigliun dal Catar.
Legenda: In beduin giauda ina pausa davos il pavigliun dal Catar. RTR, A. Caprez
Nora e Masuma.
Legenda: Nora e Masuma èn cuntentas che las temperaturas n’èn betg pli uschè bassas sco l’emna passada. RTR, A. Caprez

Suentermezdi tard pir, suenter lavur fatga, avain gì l'occasiun da visitar puspè ina pitschna part da l'ExpoMilano. Questa giada en cumpagnia da Markus Haltiner, il responsabel per la preschientscha grischuna a l'Expo.

Ecuador – multifar na be cun las colurs dal pavigliun

Il pavigliun da l’Ecuador.
Legenda: Il pavigliun da l’Ecuador. RTR, A. Caprez

En l’emprim pavigliun avain nus ans laschà guidar da noss nas. Quel ans ha gidà da tradir savurond, tgenina mangiativa u flur che sa zuppa en ina vaidrina. Quai èn differents products da l’Ecuador sco rosas, cacau o bananas. Quai che dat en egl, l'Ecuador è in dals paucs pavigliuns che n’han betg preschentà en talian u englais lur ideas, mabain be en spagnol.

Tatsch per Armon

Il proxim pavigliun, la Slovenia. Gia a l'entrada ina surpraisa. Ins pudeva cumprar da magliar ina sort tatsch. Els numnan dentant la spaisa dultscha “Smorn”. Ed encunter la chalira regala la Slovenia a mintgin in ventagl da chartun per far vent, u per sparpagliar meglier l’aria chauda davent l’agen nas vi ;)
L’exposiziun sezza, magari simpla e pitschna cun ils temas principals: sal, auas termalas, avieuls e skis.

Il martgà mediterran da la Sicilia.
Legenda: Il martgà mediterran da la Sicilia. RTR, A. Caprez

Sulets ed abandunads

Nus avain bandunà ils pavigliuns situads directamain al “Decumano”, la via principala da l’ExpoMilano, per visitar in nov lieu. Il num: Bio Mediterraneo. Malgrà varga 200'000 visitaders sin l’areal da l’Expo eran nus bunamain sulets. Pavigliuns ed expositurs ch’han in plaz main central, han difficultads d'attrair la glieud.

En Frantscha pon ins pender tut vid il plafond

Satgins da té pendan vi dal tschiel sura en il pavigliun franzos.
Legenda: Satgins da té pendan vi dal tschiel sura en il pavigliun franzos. RTR, A. Caprez

Per la Frantscha avain anc in pau energia, la saira las 8. In film animà a l'entschatta dal pavigliun declera fitg bain la problematica, ch’il nutriment n’è betg scumpartì bain sin il planet. Per chattar la soluziun da quest problem en il pavigliun franzos, ans ha dentant mancà la pazienza ed il temp! Sa però era esser ch’i na dat betg LA soluziun en quest pavigliun.

Nus avain fom!

ll Duomo a Milano.
Legenda: L’enconuschent Duomo a Milano. RTR, A. Caprez

E pigliain perquai la via sut ils pes vers la staziun da Rho Fiera, e tschantain en ch’ins maina suenter viadi da mes’ura en la citad da Milano a la Piazza Duomo. Cun temperaturas da 22 grads la saira las 9 pon ins perfin mangiar dadora tschaina :)

Artitgels legids il pli savens

Scrollar a sanestra Scrollar a dretga