Per cletg che nus pudain entrar pli svelt, grazia a l’accreditaziun sco schurnalists! Ils visitaders èn numnadamain gia en posiziun davant l’entrada in’ura avant l’avertura uffiziala da las 10:00.
«Bem vindo ao Brasil»
La rait davant il pavigliun da la Brasilia attira la glieud, ed era Anna. Ella vul perquai ir a scuvrir quell’experientscha e rampignar sur questa construcziun vi.
Las colonnas da spetg davant il pavigliun da la Brasilia èn pero uschè lungas che quest'aventura vegn spustada (cun success) sin il suentermezdi.
Engiadinais a l’Expo
Ina gruppa da 7 scolars da Sent cun lur magistra Maja Bischoff han fatg in’excursiun davent da Lugano a l’exposiziun mundiala. Las temperaturas e las dimensiuns da l’ExpoMilano han surprais ils Engiadinais.
Durant 5 uras han els empruvà da scuvrir uschè bler sco pussaivel dals pavigliuns. Nus als avain accumpagnà in’uretta.
Nua è la proxima apoteca?
Cun tut il travasch e squitsch da temp da stuair furnir contribuziuns, avain nus savens lavurà sur mezdi ed adina puspè emblidà da mangiar ad uras normalas. Pli probabel è quai ina da las raschuns ch’il stumi dad Armon ha rebellà ed ha custà el blera energia. Suenter uschè in di èn ins anc pli stanchel....
Tuttina avain nus da pachetar tut nossa rauba, perquai che damaun è noss ultim di a l’ExpoMilano.