In’aventura tut speziala va plaunet a fin
Suenter otg dis fitg intensivs cun numerus inscunters cun glieud da tut il mund, ha cumenzà per nus l’ultim di a l’ExpoMilano. Almain l’ultim en il rom d’acziun dad RTR da preschentar l’emprim’emna da l’exposiziun mundiala.
Finalmain ha Anna gì peda da giugar da turista e da chaminar sco tut ils auters visitaders da l’ExpoMilano almain ina giada da sisum fin giudim la via principala, il Decumano. Da numnar tut las 145 naziuns ch’èn preschentas sin l’areal è però bunamain impussibel.
Singulas impressiuns avain tuttina pruvà da transmetter cun nossas emissiuns davent da Milano. Funcziunà ha quai tranter auter er grazia a l’ospitalitad dal pavigliun svizzer. L’uffizi da «preschientscha Svizra» ha fatg plazza en il local da 3 sin 2 meters er per nus! Grazie Cristina, Heidi e Michele.
Las valischs èn entant gia prontas en la valischera da l’auto, bainbaud cumenza noss viadi vers chasa.
Per nus è dentant cler che nus turnain anc ina giada a l’ExpoMilano questa stad. Per mussar a nossa famiglia l’areal ed er per scuvrir sez anc dapli secrets e bellezzas da l’exposiziun.