L'inegualitad sociala en il mund s'augmenta vinavant. 62 persunas possedan tant sco 3,7 milliardas carstgauns. Quai resulta d'in studi da l'organisaziun caritativa Oxfam che vegn preschentà al forum mundial d'economia a Tavau.
Tenor il studi è il possess da questas 62 persunas creschì ils ultims 5 onns per passa 500 milliardas dollars, la facultad dals pli paupers è sa reducida en quest interval per radund in billiun u 1’000 milliardas dollars. Tenor Oxfam è in dals motivs ch'ils concerns e milliardaris pon zuppentar lur facultad avant las autoritads fiscalas. Perquai dovria ina nova politica da taglia globala.