Sin Twitter vegn tranter auter mussà in video da l'eroport da Cologna-Bonn e scrit latiers: «Quai che tes frars en la Belgia han dumagnà, dumognas ti era».
In auter maletg mussa l'uffizi da chancelier en flommas; latiers l'inscripziun: «La Germania è in champ da battaglia.» Tut en tut sajan vegnids publitgads tschintg maletgs da propaganda.
Dals attentats da suicidi en la Belgia eran mortas 38 persunas, inclusiv ils 3 attentaders.
Examinaziuns seriusas
L'uffizi federal criminal da la Germania examinescha las smanatschas da terror dal SI. I saja cler che la Germania stettia en il focus dal terrorissem internaziunal e che attatgas possian capitar. Il nov video na midia dentant nagut vid la valitaziun actuala dal privel da terror en Germania.
RR novitads 12:00