Il primminister britannic David Cameron sa retira la mesemna che vegn. Lura vegnia la ministra da l'intern Theresa May a surpigliar l'uffizi, ha annunzià Cameron il glindesdi a Londra. Ella haja ses cumplain sustegn.
Theresa May è la finala stada la suletta candidata per daventar nova manadra da la partida conservativa ed uschia era nova primministra britannica.
Uschia para il conflict da direcziun dals conservativs d’esser schlià. Lez era rut ora suenter il referendum da Brexit.
Il mardi veglia el manar si’ultima sesida dal cabinet, e la mesemna vegnia el a porscher sia demissiun a la regina Elizabeth II, ha ditg Cameron.
Leadsom sa retratga da cursa
Andrea Leadsom na vul betg daventar la proxima primministra da la Gronda Britannia ed uschia successura da David Cameron. Quai ha ella communitgà glindesdi a Londra. La ministra da l'intern, saja il pli qualifitgà per manar las tractativas davart il Brexit cun l'Uniun europeica. Plinavant na quintia ella betg cun avunda sustegn per furmar ina regenza stabila.
RR novitads 14:00 / 18:00
