La resistenza da citads e vischnancas è stada in impurtant motiv per la disditga da la refurma da taglias sin interpresas III. En l'organ che duai preparar ina nova proposta, n'èn gist quellas partidas betg represchentadas. Ueli Maurer, il minister da finanzas defenda quest proceder.
L'organ che duai preparar ina nova proposta è sa constituida ils 2 da mars, ha Maurer declerà glindesdi en l'ura da dumondas dal Cussegl naziunal. Las citads e las vischnancas vegnian cumpigliadas stretgamain en questa lavur. In'emprima audiziun haja gia gì lieu.
Partenaris da contact directs da la Confederaziun sajan adina ils chantuns, ha ditg Maurer. Il Cussegl federal giaja da quai anora che las situaziuns spezialas da las citads e da las vischnancas vegnian resguardadas. Quels sajan per la gronda part cuntents cun la cumposiziun da l'organ.
L'emna passada aveva la suprastanza da l'Uniun da las citads svizras crititgà che las citads e las vischnancas na sajan betg represchentadas en l'organ. Ils chantuns han quatter represchentants u represchentantas.
RR novitads 17:00