Ils parsuras da la CDU, la CSU e la SPD vulan construir 3 fin 5 centers da recepziun per fugitivs. 2 da quels centers duain vegnir plazzads en Bavaria. Ils fugitivs na duain betg dastgar bandunar il district da l’autoritad d’esters. Cas cuntrari perdan els lur dretg da prestaziuns. Plinavant vegn lur dumonda d’asil fermada.
Naginas zonas da transit e procedura pli svelta
Dentant na duai quai betg dar zonas da transit. Quai ha la chanceliera Angela Merkel declerà suenter discurs cun il schef da la CSU, Horst Seehofer ed il parsura da la SPD, Sigmar Gabriel. Plinavant vul la coaliziun tudestga accelerar las proceduras. Tar requirents cun paucas schanzas da vegnir recepids duai la procedura vegnir terminada aifer 3 emnas.
Critica per quest cumpromiss datti da la Partida sanestra e dals Verds. Uschia saja la procedura d'asil faira en privel.
RR novitads 07:00