La Corea dal Nord ha smanatschà als Stadis Unids ed a la Corea dal Sid cun in «cuntraculp concret». Quai suenter ch'ils dus pajas eran sa cunvegnids l'emna passada da staziunar in sistem per la defensiun da rachetas en la Corea dal Sid.
Uschè prest ch'i vegnia enconuschent nua che quest implant saja planisà vegnia la Corea dal Nord a reagir, hai num en ina communicaziun.
Il sistem da defensiun è ina reacziun sin ils tests d'atom e da rachetas cuntinuants dal pajais communistic. La Corea dal Sid ha valità la smanatscha dal vischin en il nord sco ridicula. La Corea dal Nord stoppia admetter ch'ella sez pericliteschia la pasch e la stabilitad sin la peninsla coreana. Quai ha ditg in pledader dal ministeri da defensiun sidcorean.
RR novitads 11:00
