Las investigaziuns d’anti-terror cuntinueschan en Frantscha. Sulet la notg passada haja la polizia intercurì passa 180 abitaziuns, di il minister da l'intern franzos, Bernard Cazneuve. 20 persunas haja la polizia arrestà.
Dapi las attatgas a Paris d’avant ina emna haja la polizia arrestà en tut 107 persunas. 90 sa chattian anc adina en arrest ed a 164 hajan ins ordinada in arrest da star a chasa. Ultra da quai haja la polizia era confiscà 174 armas e radund 250’000 euros, ha ditg Cazneuve. Er en Belgia investighescha la polizia vinavant.
