Il hurican «Matthew» ha cuntanschì la damaun las 7:00 (temp local) il Haiti cun tutta forza. Tenor differentas agenturas da novitads èn almain 7 persunas mortas. En il vest dal pajais sajan plirs lieus inundads, uschia communitgescha la protecziun civila. Millis persunas tschertgian schurmetg. En la chapitala Port-au-Prince è la vita publica quasi bloccada. La communicaziun saja per part interrutta e las dimensiuns dals donns betg anc cleras, ha ditg il minister da l’intern da Haiti.
Il center naziunal per huricans ha giuditgà il stemprà sco in dals pli ferms dapi in decenni e sco extremamain privlus. Matthew furiescha cun spertadads da vent da fin 230 km/h. Entant haja il hurican cuntanschì la Cuba, el haja anc adina ina spertadad da vent da 220 km/h.
RR novitads 20:00