-
Bild 1 von 5. Persunas vegnan evacuadas da la Polizia or da la piramida da vaider che fa part dal museum Louvre. Bildquelle: Keystone.
-
Bild 2 von 5. Autos da polizia parcads en vischinanza dal lieu, nua ch’il schabetg ha gì lieu. Bildquelle: Keystone.
-
Bild 3 von 5. La polizia franzosa ha bloccà il conturn dal museum Louvre a Paris. Bildquelle: Keystone.
-
Bild 4 von 5. Datiers dal lieu da l’attatga empruvada ha la polizia bloccà vias. Bildquelle: Keystone.
-
Bild 5 von 5. In schuldà postà davant il Louvre a Paris. Bildquelle: Keystone.
L'um ha clamà «Allahu akhbar» ed è currì envers policists ed ina patruglia da quatter schuldads. Sinaquai ha in dals schuldads ferì l’attatgader cun tschintg tuns grevamain. I sa tracta d'in um da 29 onns da l'Egipta, l'identificaziun formala na saja dentant anc betg succedida, ha communitgà la saira la procura publica da Paris. L'um saja en grond privel da vita.
Il schuldà che ha sajettà è blessà levamain. Quai ha communitgà Michel Cadot, il schef da la polizia da Paris. L'attatga è succedida l’avantmezdi enturn las 10:00 en in corridor che maina d'ina plazza dasper il Louvre en in center da cumpra sutterran, il 'Carrousel du Louvre'.
En il conturn dal museum Louvre èn tut las persunas vegnidas evacuadas. Il museum è vegnì serrà suenter il schabetg. Las persunas, che sa rechattavan endadens vegnan escortadas en pitschnas gruppas or dal museum. Blera polizia per part fermamain armada sa chatta en il lieu.
Tenor il ministeri da l'intern franzos sa tracti d'in schabetg serius. La procura publica fa in'inquisiziun pervi da suspect da terror.
La Frantscha è vegnida tutgada ils ultims dus onns differentas giadas dad attatgas da terrorissem islamistic. Pervi dal privel dad ulteriuras attatgas patruglieschan a Paris divers schuldads. Uschia er davant il Louvre, che vegn frequentà onn per onn da milliuns da visitaders da tut il mund. En pli è proclamà en Frantscha dapi ils 13 november 2015 il stadi d’urgenza.
Il minister da l'intern engrazia en sia communicaziun sur Twitter a las forzas da segirezza:
Las autoritads da Paris han avertì curt suenter il schabetg sur twitter:
RR novitads 11:00++