La marina taliana ha communitgà ch’ella haja liberà circa 570 persunas ord da bartgas da gumma. Vinavant ha la guardia da la costa liberà ulteriurs 780 fugitivs. En ina citad sin l’insla Sicilia èn ils davos dis anc ina giada arrivads 730 migrants ch’eran vegnids liberads or dal privel da mar. La maioritad dals fugitivs arriva da l’Africa.
Dapli fugitivs cun midada da temperatura
Cun las temperaturas pli chaudas quintan experts ch’il dumber da fugitivs che vulan traversar la Mar Mediterrana s’augmentia. Dapi l’entschatta dal 2015 èn arrivadas en l’Europa dapli che 1,2 milliuns persunas, quai da pajais arabs, da l’Africa e da l’Asia. Ils blers da quels avevan nizzegià la ruta dal Balcan ch’è entant serrada.
RR novitads 06:00