Legenda:
Il nov president civil dal Myanmar Htin Kyaw.
Keystone
cuntegn
Exteriur - L'emprim president civil dapi passa 50 onns el Myanmar
En l’anteriura dictatura militara dal Myanmar è vegnì elegì per l’emprima giada dapi passa 50 onns puspè in president civil. Il nov president è Htin Kyaw, in confident da la purtadra dal premi Nobel da pasch Aung San Suu Kyi.
Il parlament ha elegì Htin cun 360 da las 652 vuschs. Per che Aung San Suu Kyi avess sezza pudì daventar presidenta fissi stà necessari da midar la constituziun, perquai che ses figls èn Brits.
Htin vegn dentant a collavurar stretgamain cun Suu Kyi en ses uffizi che cumenza l'emprim d'avrigl. Ils ulteriurs candidats, Henry Van Thio da la minoritad dals Chin e Myint Swe dal militari, daventan vicepresidents.
