Las facultads globalas privatas èn en ils davos 12 mais s'augmentadas per 16,7 billiuns a 280 billiuns dollars. Quai ha demussà il «Global Wealth Report» da la Credit Suisse. Il motiv per la creschientscha è il martgà d'aczias flurint. Ma era ils pretschs creschents per immobiglias han contribuì.
Il mund è dentant betg mo vegnì pli ritg en cifras absolutas, mabain era en media. Numnadamain surpassa l'augment da facultad la creschientscha da populaziun. E tuttina vul quai betg dir, che mintga persuna è daventada pli ritga. Pertutgads èn cunzunt singulas regiuns ed en quellas cunzunt ils ritgs. Uschia èn en Africa, America Latina ed en la regiun Asia-Pacific s'augmentadas las facultads medias, las facultads da la classa sociala mesauna èn dentant sa reducidas. L'inegualitad da la repartiziun da facultad è damai il davos onn puspè vegnida pli gronda. Ina tendenza che vegn tenor prognosas da la Credit Suisse a cuntinuar enfin il 2022.
Pli ritg, pli pauc progress
Era la Svizra è pertutgada. Ella n'è betg mo il pajais il pli ritg. Ella è era l'unic pajais en il qual l'inegualitad n'è en il davos tschientaner betg sa reducida considerablamain. Uschia è la facultad media svizra prest dus giadas uschè auta sco la facultad da la classa sociala mesauna.
RR novitads 09:00