Il scumond da sgular che la Russia ha ordinà per l'Egipta vegn anc a valair in temp. Tenor las autoritads russas vegnian ins pir a reprender las colliaziuns cura che las mesiras da segirtad als eroports egipzians correspundian als standards internaziunals - e quai vegnia a cuzzar plirs mais.
Cun il stopp da sgols per maschinas da passagiers aveva Moscau reagì sin la crudada da l'aviun da vacanzas sur la peninsla Sinai cun 224 passagiers a bord.
Servetschs secrets dal vest supponan in'attatga terroristica sco raschun, entant che la Russia na vul betg sa fixar. I na dettia naginas indicaziuns segiras per in'attatga. L'emprim stoppian tut ils tocs da l'aviun vegnir chattads e transportads a Cairo. L'examinaziun da la crudada vegnia a cuzzar plirs mais.