Tar in stemprà en il vest da la Rumenia èn mortas la dumengia 8 persunas, 77 persunas èn blessadas. Quai communitgescha il ministeri da l'intern dal pajais. Las pli bleras unfrendas sa chattavan en il liber. In um è vegnì sturnì d'ina planta, in auter d'ina tavla da reclama.
Tenor il servetsch da l'aura è il stemprà vegnì nunspetgadamain e cun in'intensitad rara. Pertutgada il pli fitg è la citad da Timisoara. Là ha il stemprà furià cun spertadad da vent da bunamain 100km/h, ha sragischà plantas, donnegià bajetgs e bittà enturn camiuns. En blers lieus è l'electricitad crudada ora ed era il traffic da tren è stà interrut.
RR novitads 06:00