La milissa radical-islamica dals Talibans è sa declerada responsabla per l'attentat en la citad Lahore. Ins veglia far chapir al primminister pakistan che nagin possia impedir ils Talibans da far attentats da suicidi.
La bumba era explodida en in parc public en vischinanza dad ina plazza da giugar. Almain 70 persunas èn mortas e passa 340 vegnidas blessadas. Bleras famiglias che fan part da la minoritad cristiana en il Pakistan festivavan la festa da Pasca en il parc. Tranter las unfrendas sajan bleras dunnas ed uffants, communitgeschan las autoritads localas.
Ban condemnescha attatga
Entant ha il secretari general da l'ONU Ban Ki Moon condemnà l'attatga terroristica cun vehemenza. El pretenda da la regenza dal Pakistan da proteger meglier minoritads religiusas e tut ils ulteriurs umans en il pajais. Quai ha Ban ditg en ina communicaziun da las Naziuns Unidas.
En il Pakistan èn mo 1,6% dals radund 200 milliuns abitants cristians.
Novitads 20:00+