-
Bild 1 von 6. Pervi dal mattet Lucas Baptista èn ils dus uffants canonisads. Lucas Baptista en la bratscha dal papa durant la messa a Fátima. Bildquelle: Keystone.
-
Bild 2 von 6. La messa da la dumengia 100 onns suenter che Maria duai esser cumparida als uffants a Fátima. Bildquelle: Keystone.
-
Bild 3 von 6. Il papa cun entourage spirituala sin la via tar ils crettaivels. Bildquelle: Keystone.
-
Bild 4 von 6. Uss èn dus dals trais uffants sontgs - tar la matta Lúcia evaluescha il Vatican anc. Bildquelle: Keystone.
-
Bild 5 von 6. Ceremonias en onur da la Madonna a Fátima. Bildquelle: Keystone.
-
Bild 6 von 6. Crettaivels a Fátima –. gronda stima per il Papa u bun nas per ils mecanissems medials? Bildquelle: Keystone.
400’000 cartentas e cartents han dà il venderdi saira il bainvegni al papa tar ses arriv a Fátima. Oz sonda vegnan spetgads schizunt in milliun persunas a la messa da canonisaziun, la messa per declerar sontgs ils dus uffants. Tenor il lexicon online Wikipedia ha Fátima radund 12’000 abitantas ed abitants.
Tar sia appariziun a Fátima duai la dunschella Maria avair tradì trais secrets als trais uffants pasters: In pertutgava la fin da la prima guerra mundiala ed in segund davart la Russia. Il cuntegn dal terz secret n’ha il Vatican mai revelà.
Francisco, Jacinta e Lúcia
Tenor cretta catolica duajan ils fragliuns Francisco und Jacinta Marto e lur cusrina Lúcia dos Santos avair vesì la madonna suenter anc tschintg giadas. Ella haja fatg trais predicziuns als uffants, ils «Trais secrets da Fátima».
Lucas Baptista ha gidà
Ils 28 da zercladur 1999 ha papa Gion Paul II reconuschì il fenomen sco «autentic». La guariziun betg declarabla da Lucas Baptista – il mattet en la fotografia sura cun il papa – l'onn 2013 era lura l'ultim stumpel per declerar sontgs ils dus uffants. Lucas Baptista aveva sa blessà grevamain cun crudar dad in'utezza da 6,5 meters or dad ina fanestra. Ils medis avevan prognostitgà il pir, il mattet dentnat è sa revegnì.
Ils emprims uffants sontgs na martirs
Francisco e Jacinta èn ils emprims uffants, che vegnan declerads sontgs senza esser stads martirs. Els dus èn morts mo paucs onns – 1919 e 1920 – suenter l’appariziun. Francisco era diesch onns, Jacinta nov.
Lur cusrina Lúcia è vegnida mungia ed è morta en la vegliadetgna da 97 onns. Sch’ella vegn er declerada sontga, vegn anc evaluà dal Vatican.
RR novitads 14:00