Ils aviuns hajan difficultads d'atterrar en la chapitala dal Jemen Saana ha ditg in pledader dal IKRK ad agenturas da novitads. Sco quai che la Crusch Cotschna ha annunzià sa sprovian ins da schliar ils problems logistics. Il mument sajan 48 tonnas medicaments pronts da sgular a Saana.
Dumengia aveva la Crusch Cotschna communitgà da vulair furnir agid umanitar en il Jemen e da posseder la lubientscha da l’Arabia Saudita.
Entant cuntinueschan cumbats
Tar cumbats en la citad d’Aden en il Jemen èn tenor indicaziuns da medis e militar mortas almain 53 persunas. Sco in medi ha ditg ad agenturas da novitads sajan era 17 civilists tar las unfrendas.
Il cussegl da segirezza da las Naziuns Unidas n’ha anc betg decis davart ina pausa dal bumbardament en il Jemen. Ins dovria anc dapli temp per decider ha declerà in ambassadur da l’ONU. La Russia aveva proponì ina tala pausa la sonda.
RR novitads 12:00