Sco quai che Roche communitgescha, cumpria l'interpresa il concern Ignynta per 1,7 milliardas francs. L’interpresa da biotecnologia americana è spezialisada sin intercurir, identifitgar e tractar malsognas da cancer.
Roche paja 27 francs per aczia, quai tenor infurmaziuns dal concern Roche da venderdi. Il pretsch correspundia ad in augment da 74 pertschient sin il curs da clusiun da l'aczia Ignyta da gievgia. Roche vul serrar giu la transacziun en l'emprima mesadad dal proxim onn 2018.
Il concern Ignyta vegn a cuntinuar cun sia producziun a San Diego en la California.
Adattada a pazients
Tenor il schef da pharmaceutical Roche Daniel O'Day è la cunvegna cun Ignyta bajegiada sin la strategia da Roche ch'è spezialisada d'adattar ils tractaments al basegn da pazients. Uschia duessi esser pussaivel a Roche da pudair schlargiar il portfolio sin il sectur oncologia.
RR novitads 08:30