Il schef da la CSU Horst Seehofer ha annunzià da vulair introducir en Germania ina limita per fugitivs en il cas sia partida gudagnass las elecziuns.
«La limita maximala vegn en il cas che nus regin. Quai met jau qua a protocol,» ha el ditg a la Welt am Sonntag.
Merkel strictamain encunter
La CSU discurra da limitar il dumber da fugitivs che la Germania prendia si a 200’000 ad onn. Quai saja ina premissa per integraziun e segirezza. La chanceliera Angela Merkel però refusescha strictamain quest’idea.
Plinavant è Seehofer per uschenumnads centers transitorics als cunfins nua che duai vegnir decis tgi che dastga restar e tgi betg. Il tema dastgass daventar in dals principals avant las elecziuns dal Bundestag dal 2017.
RR novitads 09:00