Toyota sto clamar enavos sin l'entir mund 5,8 milliuns autos pervi da problems pussaivels cun l'airbag dal furnitur Takata. En l'Europa ston bunamain 1,5 milliuns vehichels returnar en garascha, communitgescha il concern giapunais.
En il Giapun ston radund 1,15 milliuns possessurs returnar lur autos. Sin l'entir mund han constructurs d'autos gia clamà enavos massas d’autos per barattar ils airbags manglus. Takata ballucca entant pervi da quai. Per il barat impunda l'interpresa milliardas.
Mundialmain datti almain 14 mortoris e dapli che 150 blessads ch’èn colliads cun defects mecanissems da suflar da Takata.
