Siglir tar il cuntegn
Il maletg mussa ils 6 candidats che vulan daventar president da l'Austria.
Legenda: Alexander van der Bellen, Irmgard Griss, Rudolf Hundstorfer, Andreas Khol, Norbert Hofer, Richard Lugner. Keystone

Exteriur Tschertgà: In nov president per l'Austria

L'Austria stat probabel avant ina midada istorica: Il favurit è Alexander van der Bellen, anteriur president da la partida verda. I fiss l'emprima giada dapi 60 onns che nagin represchentant da la SPÖ u ÖVP sesa sin la sutga dal president da stadi.

6 candidats cumbattan per il presidi

Il favurit Alexander van der Bellen (72 onns) è professer d'economia ed anteriur president da la partida verda. El haja l'avantatg che las partidas tradiziunalas ÖVP e SPÖ ruschnian adina pli fitg a la dretga e perquai saja el per bleras votantas e votants in candidat elegibel, di il schefredactur dad ORF Vorarlberg Gerd Endrich.

Sin ils chaltgogns dal favurit èn dus candidats fitg differents: Norbert Hofer (45 onns, FPÖ) crititgeschia l'Uniun Europeica e la politica d'asil e l'anteriura derschadra Irmgard Griss (69 onns, senza partida) n'haja zuar betg experientscha politica, ma ella cuntanschia surtut persunas che s'interesseschian uschiglio betg per politica.

Ils candidats dad SPÖ (Rudolf Hundstorfer) e dad ÖVP (Andreas Khol) ston tenor Gerd Endrich dar gas enfin dumengia, uschiglio n'han las duas partidas da tradiziun betg pli enta maun il presidi austriac.

Il maletg mussa il president austriac Heinz Fischer
Legenda: Ses temp d'uffizi va a fin suenter 12 onns: Il president austriac Heinz Fischer. Keystone

Nagina schanzas sin in'elecziun ha l'anteriur impressari e promi dal Wiener Opernball Richard Lugner (83 onns). Tut tenor da tgi ch'el piglia davent vuschs, pudess el tuttina anc influenzar la dumonda tge dus candidats che dumognan la cursa per in segund scrutini.

Blera pussanza - sin il palpiri

En l'Austria ha il president dapli pussanza ch'en auters pajais: El po per exempel dar cumonds a l'armada, proclamar tut persuls il schef da regenza u era relaschar l'entira regenza. Quai sajan dentant incumbensas be sin il palpiri, declera Gerd Endrich. En la pratica sa restrenschia il president sin incumbensas represchentativas.

Chattar soluziun per controllas da cunfin al Brenner

Il minister da l’intern da l’Austria Wolfgang Sobotka ha annunzià da vulair chattar ina soluziun cun l'Italia en la dumonda da controllas da cunfin al pass dal Brenner. quai ha Sobotka ditg suenter in inscunter cun ils presidents da las regenzas dal Tirol e dal Tirol dal Sid.

Cunzunt il president da la regenza dal Tirol dal Sid Arno Kompatscher ha appellà da tschertgar soluziuns communablas per la dumonda, co agir cun controllas al Brenner.

La construcziun d’ina saiv da cunfin n’è actualmain anc betg decidida per il minister. Quest pass dependia da la prontadad da cooperar da l’Italia. «Sche l’Italia na prenda naginas mesiras, lura vegn fermà ina saiv», uschia Sobotka. Sco mesira preventiva vegnian dentant gia construids ils fundaments per la saiv.

RR novitads 06:00

Artitgels legids il pli savens