Basa per la decisiun è stada ina proposta da la cumissiun da l’UE dal matg passà. Quella giada aveva ella proponì da scumandar vaschella, bavrolas, bastunets da vatta ed auters products da plastic betg pli reutilisabels.
La cumissiun spetga bler da quests plans: Uschia duain vegnir reducidas las emissiuns da CO2 per 3,4 milliuns tonnas. Il scumond duai gidar a franar en emprima lingia las massas da rument da plastic en las mars. Pli che 80% dal rument en las auas saja plastic, di la cumissiun.
La cunvegna dals negoziaders da l'UE ha anc da vegnir confermada uffizialmain. Il scumond entra probablamain en vigur en dus onns.
RR novitads 08:00