- Facebook è schoccà pervi dal scandal enturn la firma d'analisa Cambridge Analytica.
- Il concern fetschia tut per proteger las datas dals utilisaders.
- L'autoritad per la protecziun dals consuments FTC investighescha cunter Facebook. La dumonda principala è sche Facebook era infurmà davart l'abus.
L’entira interpresa saja schoccada da la cugliunaria. Quai ha communitgà il concern. Ins saja conscient quant seriusa che la situaziun saja. Facebook fetschia tut il pussaivel per proteger las datas da ses utilisaders. Il schef da Facebook, Mark Zuckerberg, n’ha fin uss dentant anc betg prendì posiziun persunalmain.
Consequenzas persunalas tar Cambridge Analytica
En il fratemp ha la firma britannica Cambridge Analytica suspendì ses schef. L’interpresa ha para fatg abus da datas da var 50 milliuns utilisaders da Facebook. I sa tracta probabel dal pli grond scandal da datas tar Facebook.
Aczia da Facebook sfundra
Er las bursas reageschan sin la malsegirezza actuala. Suenter che l’aczia da Facebook ha pers il glindesdi bunamain 7%, ha ella pers il mardi passa 6%. Temporarmain è la valur dal concern sa reducida per 50 milliardas dollars.
Emprims plants ed investigaziuns cunter Facebook
Investiders americans han gia purtà l’emprim plant cunter Facebook tar in tribunal federal a San Francisco. La direcziun da Facebook haja engianà ils utilisaders davart la pussaivladad da proteger lur datas. Quai fan els valair davant dretgira.
L’autoritad americana per la protecziun dals consuments FTC vul ussa examinar pli bain il scandal da datas da Facebook.
Era il parlament britannic ed il parlament d’Europa han convocà il schef da Facebook, Marc Zuckerberg, ad in’ audiziun.
RR novitads 06:00
