A l'inscunter suprem a Singapur è il schef da stadi nordcorean Kim Jong Un sa professà ad in discharmament nuclear cumplet da la peninsla coreana.
Decleraziun cuminaivla suenter l'inscunter suprem
Quest discharmament nuclear saja uss la finamira. Ella saja cuntegnida en la declaraziun cuminaivla, ch'ils dus schefs da stadi Donald Trump e Kim Jong Un han suttascrit a la fin da lur inscunter a Singapur.
Persuenter garanteschia Trump a Kim segirezza, scrivan las agenturas da novitads.
Kim Jong Un di da princip «gea» – il «cura» resta avert
Kim Jong Un saja da princip perencletg da denuclearisar la Corea dal Nord «cumplettamain». La declaraziun suttascritta laschia dentant avert ils termins.
Il document saja plitost vag e determineschia be, ch'il minister da l'exteriur american Mike Pompeo vegnia a discutar «bainprest» cun la Corea dal Nord per metter enturn ils resultads da l'inscunter da maniera «speditiva».
Il president american Donald Trump n’ha betg laschà mitschar l’occasiun da publitgar sin il servetsch da messadis curts twitter in video da l’inscunter:
L'andament da l'inscunter suprem
L'emprim èn ils dus schefs da stadi sesids ensemen durant var ina mes'ura. Suenter han cumenzà discurs en ina runda pli gronda. Là sajan stads da la partida sper Donald Trump e Kim Jong Un ils ministers da l’exteriur dals dus pajais.
Suenter ils discurs, il gentar ed il inscunters han ils dus schefs da stadi sa chattads per ina spassegiada bain-inscenada tras il parc da l'hotel sin l'insla da vacanzas Sentosa a Singapur.
«Il grond problem» da las armas nuclearas
Tenor Trump saja l'inscunter stà «fitg bun». El haja ina «excellenta relaziun» cun il schef da stadi nordcorean Kim Jong Un ed els vegnan a resolver ensemen «il grond problem» da las armas nuclearas. Tge ch'è vegnì fatg giu concretamain n'è betg anc vegnì enconuschent.
Suenter decennis da tensiuns e provocaziuns militaras emprovan ils dus pajais da s'avischinar.
Curt avant l'inscunter aveva il president american Donald Trump ans s'exprimì via il servetsch da messadis curts twitter: «Nus vegnin tuts a vesair bainbaud, sch'i po dar in vair deal u betg» scriva el.
Avant l'inscunter suprem valitavan experts internaziunals gia il fatg, ch'il haja insumma lieu, sco success.
RR novitads 06:00
