En l’Islanda è rut ora in vulcan en la vischinanza da la chapitala Reykjavik. I valia il stgalim d’alarm «cotschen», ha communitgà il servetsch meteorologic da l’Islanda la mesemna. Ils aviuns na dastgan betg sursgular ils conturns directs. Helicopters sajan al lieu per scuvrir la situaziun.
Fim e lava èn sortids d’ina sfendaglia da la muntogna Fagradalsfjall, quai han mussà maletgs e videos da l’agentura da novitads locala RUV. Il mars 2021 avevi dà ina sumeglianta erupziun da vulcan, quella giada aveva l’activitad vulcanica cuntinuà enfin settember.