La banca Credit Svizzer (CS) ha pers l'emprim process penal en Svizra encunter ina banca gronda. Il Tribunal penal federal a Bellinzona l'ha declerà culpant en connex cun in cas da lavar daners suspectus da la mafia da la Bulgaria. La banca gronda sto pajar ina multa da 2 milliuns francs pervi da mancanzas organisatoricas internas.
Mancanza da surveglianza tar collavuratura e banca
Ina collavuratura da la CS è sentenziada a praschun per part cundiziunada. Sco quai ch'il tribunal communitgescha, ha l'anteriura collavuratura da la CS fatg transacziuns sin incumbensa da la clienta ils onns 2007 e 2008. E quai schegea ch'i deva gia lura indizis per la derivanza criminala dals daners. Uschia haja ella contribuì a zuppar dal stadi passa 19 milliuns francs da l'organisaziun criminala. Pertutgant la banca constatescha il Tribunal federal penal mancanzas en las relaziuns cun clients però era en la surveglianza e controlla che las reglas cunter lavar daners vegnian respectadas.
Il process vala sco cas da precedenza per in agir pli sever da la giustia cunter las bancas da la Svizra. La Credit Suisse ha annunzià ch'ella vegnia ad appellar cunter la sentenzia.