La dispita tranter la giustia americana ed il concern Apple è a fin. La giustia americana aveva vulì che Apple deblocheschia il telefonin d’in dals attentaders da San Bernardino.
Als investigaders para quai d’esser gartegià da debloccar il telefonin era senza l’agid dad Apple, scrivan las autoritads. Co che quai è reussi n’è betg propi cler. I vegnia dentant desistì d’in’accusa cunter Apple.
Soluziun è nunclera
Apple aveva refusà da surdar datas ord motivs che tut las datas d’utilisaders sajan periclitadas. Gia l’emna passada avevan las autoritads americanas annunzià d’avair survegnì propostas per debloccar il telefonin.
Tgi ch’è il gidanter e co che la metoda funcziuna n’è betg enconuschent fin uss. Teoreticamain pudessan ils investigaders er avair survegnì in tip areguard il pled-clav. Il communiqué da l’emna passada lascha dentant supponer ch’i sa tracta d’ina soluziun tecnica.
Experts avevan speculà ch’i sa tractia d’ina flaivlezza en la software dad Apple. Era deva quai speculaziuns davart in proceder cumplex, cun il qual il telefonin duess vegnir avert e las datas vegnir copiadas sin in auter med d’arcunaziun.
Mazzacra da San Bernardino
Tenor in rapport nunconfermà da la gasetta «Yedioth Ahronoth» haja la firma israeliana Cellbrite gidà a las autoritads americanas. L’interpresa è sa spezialisada da rabitschar or datas d’apparats mobils.
Il mez favrer aveva ina derschadra ordinà Apple da gidar il FBI da debloccar in iphone 5C ch’era vegnì duvrà da l’attentader da San Bernardino. El e sia dunna avevan mazzà 14 persunas en la citad californiana. Il pèr era mort durant ina sajettada cun la polizia e duai avair sustegnì il Stadi Islamic.
RR novitads 06:00