En il Nepal ha stremblì la terra la notg passada. Almain 129 persunas sajan mortas, 150 ulteriuras sajan vegnidas blessadas. Quai han communitgà las autoritads localas. Il dumber d'unfrendas pudess dentant anc s'augmentar, cunquai ch'i na dettia naginas indicaziuns confermadas da regiuns isoladas dal rest dal mund.
Bleras chasas sajan construidas ord crap ed arschiglia. Quai saja in dals motivs per ils donns, uschia in represchentant d'in vitg pertutgà. En general sajan las regiuns pertutgadas plitost paupras. Per part manchia infrastructura sco ospitals ubain vias. Persunas d'agid rivian per part mo a pè als lieus. Persunas blessadas duain vegnir sguladas – sche pussibel – cun helicopter en ils centers regiunals.
5,6 sin scala da richter
Tenor il servetsch seismologic dals Stadis Unids «USGS» ha il terratrembel gì ina fermezza da 5,6. L’epicenter saja stà radund 300 kilometers en il nordvest da la chapitala Kathmandu. Il terratrembel saja anc stà da sentir a Neu-Delhi en l’India, rapportan medias localas.
Zona tectonica fitg activa
Il Nepal sa chatta en ina zona da subducziun dal Himalaja, nua che la platta continentala da l’India frunta sin la platta eurasiana. Quai chaschuna adina puspè grevs terratrembels. Il 2015 eran radund 9'000 umans morts d’ina stremblida datiers da la chapitala Kathmandu.
Or da l'archiv