Pervia dal stemprà da tropas «Nalgae» en il sid da las Filippinas èn morts bunamain 100 persunas. Las bleras persunas sajan mortas en consequenza dad inundaziuns e bovas. Actualmain sajan anc passa 60 persunas sparidas. Bunamain ina milliun persunas han stuì bandunar lur chasas, sco che l’autoritad naziunala per la protecziun da catastrofas ha communitgà.
L'emprim aveva il stemprà devastà il sid da las Filippinas. Il pli fitg pertutgà da las malauras saja stada l’insla Mindanao en il sid dal pajais. Il stemprà tropic è lura ì vinavant en direcziun nordvest. Là eran surtut pertutgadas la regiun Western Visayas e las provinzas dal sid da la chapitala Manila. Tozzels da sgols èn vegnids stritgads, il traffic da bastiments è vegnì sistì en grondas parts dal pajais.
Tenor servetschs meteorologics vegn il stemprà a bandunar las Filippinas il glindesdi suentermezdi (temp local) ed ir vinavant en direcziun China dal sid.