- Il terratrembel ha cuntanschì ina magnituda da 7,7. L’epicenter sa chattava 225 kilometers en il sidvest da la citad chilena Puerto Montt sin l’insla Chiloé.
- Il servetsch da catastrofas ha puspè schlià ils avertiments per tsunamis.
- Tenor la protecziun civila n’han naginas persunas pers la vita.
Grond levgiament en il sid dal Chile: Suenter in terratrembel da la fermezza 7,7 para il privel da tsunamis d’esser passà. Il servetsch da catastrofas ha puspè schlià ils alarm correspundents, avertescha dentant d’era vinavant esser precaut.
I na duai betg avair dà persunas blessadas u mortas. Ils donns chaschunads vegnan ad esser pitschens. Avant eran plirs lieus costals vegnids evacuads.
Adina puspè terratrembels en il Chile
Chile sa chatta a l’uschenumnà ‘rintg da fieu pacific’. A la tschinta da vulcans en furma d’in fier-chaval ch’enserra l’Ocean Pacific fruntan gist pliras plattas continentalas ed oceanicas ina sin l’autra. Cunquai ch’i èn adina en moviment, datti adina puspè terratrembels en il Chile.
Il favrer 2010 eran dapli che 500 persunas mortas en il Chile tras in terratrembel da la fermezza da 8,8, suandà d’in tsunami.
RR novitads 16:00 / 18:00