Siglir tar il cuntegn
Inhalt

Exteriur Fin il 2030: 170 milliuns uffants en povradad

Quai scriva UNICEF en ses ultim rapport. Cunzunt parts da la Sahara sajan pertutgadas. L'ovra d'agid pretenda da las regenzas da cumbatter quest svilup.

Uffant sin ina plazza da rument, India.
Legenda: Cunzunt uffants en l'India ed en l'Africa èn pertutgads da povradad extrema. Reuters

Fin l'onn 2030 pudessan fin 170 milliuns uffants viver en povradad. Quai tenor la stimaziun dad UNICEF, l'Ovra d'agid per uffants da las Naziuns Unidas. En ses rapport annual scriva UNICEF ch' il territori en il sid da la Sahara saja spezialmain pertutgà.

Là pudessan 9 da 10 uffants crescher si en povradad extrema. Vinavant scriva l'ovra d'agid che 69 milliuns uffants sut 5 onns moran probabel fin il 2030 pervi da raschuns che fissan per gronda part evitablas. I va per avunda da mangiar ed il provediment medicinal.

UNICEF pretenda en consequenza dapli engaschi da las regenzas en l'entir mund cunter quest svilup.

RR novitads 06:00