Finalmain in Oscar per Leonardo Di Caprio

La notg passada èn ils Oscars puspè vegnids surdads a Hollywood. E finalmain ha Leonardo Di Caprio gudagnà l’Oscar sco meglier actur, numnadamain per sia rolla en il film «The Revenant».

L'actur Leonardo Di Caprio Bild in Lightbox öffnen.

Legenda da maletgs: Finalmain èsi gartegià: Leonardo Di Caprio cun ses Oscar. Reuters

«The Revenant» ha er survegnì l’Oscar per la meglra reschia: Sco gia l’onn passà ha Alejandro González Iñárritu gudagnà quest premi.

Meglra actura è Brie Larson vegnida, ella ha giugà en il film «Room». Meglier film è Spotlight daventà. Meglier actur secundar è Mark Rylance per sia rolla en «Bridge of Spies» e meglra actura secundara è Alicia Vikander en «The Danish Girl».

L'Oscar per la meglra musica da film ha survegnì Ennio Morricone. Il Talian ha cumponì passa 450 tocs per films, tranter auter per il film «Spiel mir das Lied vom Tod» u per «The Hateful Eight».

Ils victurs da l'Oscar

Meglra actura principala: Brie Larson
Meglier actur principal: Leonardo Di Caprio
Meglra actura secundara: Alicia Vikander
Meglier actur secundar: Mark Rylance
Meglra reschia: Alejandro G. Iñárritu
Meglier film: Spotlight
Meglier script original: Spotlight
Meglra musica da film: Ennio Morricone

RR novitads 06:00