A Dixville Notch en il stadi New Hampshire, radund 30 kilometers davent dal cunfin canadais, è l’urna vegnida serrada. Ils abitants èn sa decidids cun quatter a duas vuschs per la candidata democrata Hillary Clinton.
La vischnanca è dapi l’onn 1960 l’emprima che votescha. La lescha dal stadi federativ da New Hampshire permetta numnadamain a vischnancas cun pli pauc che 100 abitantas ed abitants, dad eleger gia a partir da mesanotg. Perquai era il biro electoral vegnì avri punct mesanotg.
Ina persuna, ch’era s’inscritta pir l’ultim mument per eleger, ha dat sia vusch schizunt a Mitt Romney – il candidat republican ch’aveva candidà cunter il president actual Barack Obama – malgrà che Romney n’ha betg candidà.
Tar las elecziuns avant quatter onns avevi dà a Dixville Notch in pari: Quatter per il democrat Barack Obama vs. quatter per il republican Mitt Romney. Quella giada era quai ina participaziun da 100% da las votantas ed ils votants.
RR actualitad 06:00