Fitg bletsch e tuttina bler memia chaud

Guardà globalmain è l’onn 2016 stà il pli chaud dapi las emprimas mesiraziuns sistematicas. Bain era la temperatura en Svizra er per 1,5 grads pli auta, records sco ils ultims onn n’ha quai dentant betg dà. Perquai è quai simplamain stà memia bletsch.

Ina dunna en in prà cun in parisol blau. Bild in Lightbox öffnen.

Legenda da maletgs: Bletsch e chaud Uschia sa lascha resumar en dus pleds l'aura en Svizra dal 2016. Keystone

Il stgaudament global è actualmain il tema ecologic che dominescha. Betg da sa smirvegliar: Guardà sin l’entir mund è il 2016 stà il pli chaud onn dapi las mesiraziun ed ha anc ina giada surpassà il record d’enfin qua. En Svizra n’ha quai percunter da nagin nov record da temperaturas il 2016.

Chalira da stad moderada

La stad passada è la marca da 35 grads vegnida surpassada be ina giada, numnadamain ils 23 da zercladur cun 35,3 grads a Visp en il Vallais. Gnanc la stiva da sulegl da la Svizra è stada uschè chauda. En il Tessin èn vegnids mesirads maximalmain 32,2 grads a Chiasso, ils 9 da fanadur.

Er durant l’enviern betg fitg fraid

L’enviern n’ha era betg fatg gronds sigls engiu. La valur uffiziala la pli bassa è vegnida mesirada sin il Pass dal Fuorn ils 18 da schaner cun -29,3 grads. En general è quest di stà il pli fraid da l’onn, cun temperaturas da -15,2 grads ad Aadorf (Turgovia) e -16,0 grads a Koppigen (Berna).

Partida bletscha

L’onn passà è en blers lieus stà memia sitg. Cuntrari il 2016: Ils blers lieus han mesirà memia bler’aua da surengiu. A Turitg hai l’ultima giada il 2001 dà dapli precipitaziun. A Son Gagl hai fin uss dà radund 1’500 mm, normal fissan 1’250 mm. Basilea mesira 30% dapli plievgia ch’uschiglio, 350 mm dapli ch’il 2015. Cunzunt durant l’emprima mesadad da l’onn hai dà dapli precipitaziun ch’usità.

RR novitads 09:00