Siglir tar il cuntegn

Exteriur Florence chaschuna plievgia intensiva ed inundaziuns

Il stemprà a la costa orientala dals Stadis Unids è arrivà sur terra. Entaifer dus u trais dis vegnia a plover tant, sco schigliò en otg mais, uschia ils servetschs da metereologia naziunals.

Purtret da l'um co el stauscha il rom.
Legenda: In um a North Carolina muventa il rom d'ina planta ch'è crudà per ch'el possia passar cun ses auto. Keystone

Enfin uss ha il stemprà gia chaschunà tschintg morts. Tenor indicaziuns da la polizia èn ina dunna e ses uffant morts pervi d'ina planta crudada enturn a North Carolina. Er là èn dus umens vegnids mazzads d'in culp electric ed ina dunna saja morta d'ina attatga dal cor. Ils sanitaris na sajan betg arrivads ad uras tar ella perquai ch'ina via è stada bloccada.

Las autoritads han avertì che Florence sa movia be plaunet enavant, el stauschia dentant davant na grondas massas d'aua. Grondas parts da North e South Carolina possian perquai vegnir inundads ils proxims dis. En omadus stadis èn il mument prest 720'000 persunas senza electricitad. En tut periclitescha il stemprà radund 10 milliuns persunas.

Blera plievgia ed inundaziuns

Florence ha cuntanschì la costa venderdi bun'ura. Las spertadads da vent èn bain sa reducidas, ma il servetsch d'aura naziunal suppona ch'i pudess plover durant ils proxims dus dis tant sco uschigliò durant otg mais.

Entant n'è il stemprà nagin hurican pli. Il center naziunal per huricans ha degradà Florence tar in stemprà da tropas, perquai ch’ils suffels buffan uss cun spertadads d'enturn 120kilometers l’ura.

RR novitads 06:00