Siglir tar il cuntegn

Header

cuntegn

Exteriur «Florence» e «Mangkhut» pericliteschan milliuns da persunas

En il vest haja l’hurican «Florence» cuntanschì la costa orientala dals Stadis Unids en North Carolina – en l’ost temian almain quatter milliuns persunas l’arriv dal taifun «Mangkhut». Quai rapportan las agenturas da novitads SDA, DPA ed AFP.

Il sa cuntegnair ed il svilup da tuts dus stemprads vegn gia observà dapi dis cun gronds pensiers. Las autoritads èn alarmadas, la populaziun mitscha u fa barricadas.

«Florence» smanatscha l’ost dals Stadis Unids

Malgrà ch’il hurican Florence è daventà pli flaivel e figurescha uss be anc sin il stgalim 1 da 5 da la scala da mesirar huricans, teman millis e millis da persunas ses arriv. Pli che 1’300 sgols han stuì vegnir sviads. Tenor ils experts sa muenta Florence cun 150 kilometers l’ura fitg plaun per in hurican ed è per arrivar a la costa da North Carolina.

La populaziun haja gia uss da cumbatter cun auazuns, vents burascus e tschientmilli chasadas n’hajan betg electricitad, rapportan las autoritads.

Gronda è surtut la tema da las auazuns, che possian anc vegnir: A las costas da North e South Carolina sbuccan plirs flums en l’Atlantic. Perquai teman er citads a lur rivas en l’intern dal pajais las auas grondas. Pervi che Florence sa muenta be uschè plan spetgan ils experts che la plievgiada vegn a durar fin a quatter dis.

«Mangkhut» frunta sin las Filippinas

Da l’autra vart dal mund smanatscha in stemprà anc bainquant pli burascus: Tar il taifun Mangkhut sa tractia quai dad in super-taifun che ha cuntanschì en il Pacific sveltezzas da vent fin a 255 kilometers l’ura ed ina forza che correspundia a la fermezza 5 sin la scala da huricans, scriva l'agentura da novitads franzosa AFP.

Sin sia via supponida sur las inslas filippinas vers la costa fitg populada dal sid da la China cun Hongkong, vivan 4,3 milliuns persunas, rapporta l’agentura da novitads tudestga DPA. Mangkhut vegnia a tutgar la terra la sonda avantmezdi (temp dal lieu) per l’emprima giada tar l’insla filippina Luzon.

Tenor Michael Conag dal servetsch da catastrofas saja da far quint cun undas grondas nà dal mar, che possian vegnir uschia autas sco ina chasa da quatter plans. Grond privel dettia quai per las chamonas simplas a la riva dal mar, nua che blera glieud viva.

Tschients da persunas perdan mintg’onn lur vita en in dals var 20 taifuns e stemprads annuals sin las Filippinas.

RR novitads 06:00+

Artitgels legids il pli savens