Il Fond monetar internaziunal (IWF) è s’exprimì da maniera positiva davart l’introducziun da tschains negativs d’intgins instituts d’emissiun. Ma la mesira saja sulet buna sco schliaziun provisorica.
Tenor l’IWF gida quest pass a stimular l’economia e a levgiar las cundiziuns per credits. Dentant sajan tschains negativs mo ina schliaziun provisorica ed i dettia sulet paucas experientschas cun quests tschains negativs. Fin uss han sis instituts d’emissiun introducì tschains negativs, tranter quels er la Banca naziunala Svizra.
