Il departament ch'i ha tutgà il pli ferm è Aude. Là vala il grad d'alarm cotschen. Las scolas en il departament pertutgà d'Aude sajan serradas, plinavant sajan er numerusas vias bloccadas. Las autoritads han appellà da betg bandunar las chasadas. Ils pumpiers han stuì vegnir en acziun radund 250 giadas.
Uschè blera plievgia sco normalmain durant in mez onn
Las medias rapportan da vias inundadas ch'èn sa transfurmadas en flums. Cura che las auas grondas sajan vegnidas sajan bleras persunas fugidas sin tetgs. Per evacuar quellas èn helicopters en acziun. Tenor in prefect haja quai dà en la notg da dumengia sin glindesdi uschè blera plievgia sco normalmain durant in mez onn. Las auas grondas dal flum Aude han entant cuntanschì uschè in'autezza sco la davosa giada il 1891, quai annunzian las autoritads.
RR novitads 10:00