Tar malauras en il sidost da la Frantscha èn almain tschintg persunas mortas. Quai han communitgà las autoritads localas. Trais da las unfrendas sajan gidanters che sajan crudads giu cun in helicopter durant in'acziun da salvament datiers da la citad da Marseille.
Las duas ulteriuras unfrendas èn vegnidas tschiffadas da las auas en il departament Var. Pervi dal privel da malauras valeva en ils departaments Var ed Alpes-Maritimes il pli aut stgalim d’alarm. Cunzunt las regiuns da costa èn stadas pertutgadas.
Gia l’emna passada han malauras chaschunà caos en la Frantscha dal Sid. Vias èn stadas serradas, trens èn crudads or e plirs lieus èn vegnids inundads. Almain sis persunas èn mortas en las auas. Anc adina vala per bunamain 150 vischnancas il stadi d'urgenza.
RTR novitads 06:00