Siglir tar il cuntegn

Exteriur Frantscha haja violà la suveranitad da la Libia

La regenza transitorica da la Libia ha condemnà en ina declaraziun l'operaziun militara da la Frantscha cunter la milissa terroristica Stadi islamic en il pajais.

Maletg simbolic: Truppas franzosas gidan truppas dal Mali e transportar davent in helicopter defect.
Legenda: Maletg simbolic: Truppas franzosas gidan truppas dal Mali e transportar davent in helicopter defect. Keystone

Operaziuns da pajais amis cunter la milissa terroristica Stadi Islamic sajan da beneventar, ma ellas stuessan vegnir coordinadas cun la regenza.

En pliras citads da la Libia han tschients da persunas demonstrà cunter la preschientscha militara da la Frantscha. Quella era vegnida enconuschenta suenter che la regenza franzosa aveva communitgà che 3 schuldads eran morts en la Libia.

Differentas indicaziuns davart l'accident

Davart l'accident dals schuldads datti differentas indicaziuns. Tenor il president franzos, François Hollande, sajan ils schuldads morts perquai ch'il helicopter saja crudà giu tar ina missiun privlusa. Tenor funtaunas da la Libia percunter saja il helicopter vegnì sajetta giu cun ina racheta, probabel da gruppas islamisticas.

I regia caos

Dapi ch'il diictatur Muammar al-Gaddaffi è vegnì cupitgà il 2011, regia caos en la terra da l'Africa dal Nord. Da quai profitan tranter auter la gruppa terroristica Stadi islamic ed autras gruppas dschihadisticas. Ina regenza transitorica emprova entant da survegnir la controlla en il pajais, quai cun sustegn da las Naziuns Unidas.

RR novitads 06:00