Il minister da l'intern Gérald Darmanin ha annunzià che tut ils lieus simbolics, nua ch'i ha dà attatgas terroristicas, sco la sala da concerts Bataclan vegnian uss survegliads permanent. Er duain per exempel sinagogas vegnir survegliadas meglier durant dis da festa sco per exempel Jom Kippur.
Venderdi a mezdi eran dus collavuraturs d'ina firma da producziun vegnids blessads tar in'attatga da cuntè. L'attatga è capitada datiers dal bajetg nua che la redacziun da Charlie Hebdo era oriund, en l'ost da Paris. Ils investigaders d'anti terror da la procura publica han cumenzà cun lur investigaziuns. Darmanin ha discurrì d'in act terroristic islamic. Dasper in suspectà principal sajan ulteriuras persunas vegnidas arrestadas.
Plinavant ha Darmanin accentuà ch’i dettia en Frantscha adina in grond privel da terror. Dapi l'entschatta settember va il process cunter ils gidanters da la seria da terror dal schaner 2015. Lura eran 17 persunas mortas.
