En Frantscha sto il persunal da tgira sa laschar vaccinar cunter Covid-19. Suenter l’assamblea naziunala ha er il senat cleramain approvà la nova lescha. Persunal anc betg vaccinà po uss far quai fin mez settember. Ultra da quai duai il certificat da Covid daventar obligatoric er per ir en restaurants, centers da cumpra ed er cun trens a gronda distanza. Quai a partir da l’auter mais. Cunter la lescha han millis da persunas en l’entir pajais demonstrà la fin d’emna.
Cumpromiss tar l'obligaziun da vaccinar
Per la formulaziun finala da la lescha han las duas chombras parlamentaras debattà plirs dis. La finala èn ellas sa cunvegnidas sin in cumpromiss. La lescha approvada prevesa l'obligaziun da vaccinar per il persunal da tgira e da sanadad sco era pumpiers ed ulteriuras forzas da salvament. Cuntrari che proponì da la regenza franzosa na smanatscha a refusadras e refusaders da la vaccinaziun dentant betg la relaschada, i vegn sulet suspendida la paja.
Mez fanadur aveva il president Emmanuel Macron annunzià las mesiras pli severas. Uschia vul ins reducir l'augment massiv da novas infecziuns da corona entras la varianta delta.