Siglir tar il cuntegn

Header

cuntegn

Exteriur Frantscha sgola danovamain attatgas sin il SI en Siria

La Frantscha ha danovamain sgulà attatgas sin in dals centers da la gruppa da terror Stadi Islamic en la Siria. Tar las attatgas da questa notg sin la citad da Al-Rakka hajan ins destruì plirs indrizs da la gruppa da terror, annunzia l'armada franzosa.

Gia il glindesdi aveva l’aviatica militara franzosa bumbardà la citad siriana. Suenter las attatgas terroristicas a Paris aveva il president franzos François Hollande annunzià ch’il pajais intensiveschia las attatgas cunter il Stadi Islamic.

La tur Eiffel illuminada en las colurs da la Frantscha.
Legenda: Tge che la Frantscha spetga dals ulteriurs stadis da l'UE n'è anc betg cler. Keystone

Frantscha dumonda l'UE per agid

La Frantscha vul para dumandar uffizialmain agid dals ulteriurs pajais da l’Uniun europeica. Tenor diplomats duai quai succeder oz en il rom da l'inscunter dals ministers da defensiun.

Da tge furma da sustegn ch’i sa tracta è anc avert. Tenor diplomats pudess quai sa tractar dad in act simbolic, sco era da pretaisas concretas sco in barat pli intensiv tranter ils servetschs secrets. Che la regenza franzosa dumonda in engaschi pli activ da pajais da l'UE en il cumbat cunter la gruppa da terror Stadi Islamic vala sco pauc probabel.

RR novitads 06:00 / 08:00

Artitgels legids il pli savens