Il rapinament d'ostagi en ina baselgia franzosa è tenor il president François Hollande stà in'attatga da terror. Il spiritual saja vegnì mazzà da dus terrorists che sajan sa referids sin il Stadi islamic, ha ditg Hollande durant ina visita al lieu da delict a Saint-Etienne-du-Rouvray. Detagls n'ha il president però betg numnà.
Pliras mungias tranter ils ostagis
Dus umens armads cun cuntels hajan tegnì a ferm 4 fin 6 persunas. Quai durant la messa da la damaun. Tranter ils ostagis sajan er stadas pliras mungias. Davart la raschun per il rapiment u l'identitad dals rapinaders na datti il mument anc naginas indicaziuns.
Identifitgà in dals rapinaders
Entant è in dals dus attentaders vegnì identifitgà. Tenor la procura publica era quel enconuschent a las autoritads sco dschihadist e stueva perquai purtar ina chadaina vid il pe. Il 2015 haja l'um da 19 onns empruvà duas giadas da viagiar en Siria. Ina giada saja el vegnì arrestà en la Germania, l'autra giada en la Tirchia. Sinaquai è l'um vegnì accusà en Frantscha e vegni mess sut arrest d'inquisiziun. Il mars da quest onn è el lura vegnì relaschà sut arrest da chasa.
Violenza senza senn
Il Vatican ha entant reagì. Papa Francestg ha condemnà il mazzament sco violenza senza senn. Quest rapiment d'ostagis saja in'ulteriura novitad sgarschaivla.
Naginas leschas pli severas
Il president franzos François Hollande na vul betg rinforzar las leschas d'anti-terror. Quai ha el ditg mardi saira suenter l'attatga mortala sin in spiritual en ina baselgia en la Normandia.
Da restrenscher la libertad sco quai che l'opposiziun pretendia na fetschia betg pli effizient il cumbat cunter il terrorissem, uschia il president franzos. Quai flaivlentassia be il spiert da cuminanza da la naziun. Ils terrorists veglian separar la societad, ha ditg Hollande vinavant. Sia regenza saja però persvadida da gudagnar il cumbat cunter il terrorissem.
RR novitads 12:00+
