Siglir tar il cuntegn

Exteriur Frantscha vul spargnar 16 milliardas euros il 2016

La regenza franzosa vul spargnar l’onn che vegn 16 milliardas euros. En il budget preschentà per il 2016 preveda ella era reducziuns fiscalas da 2 milliardas euros per ils tegnairchasas e distgargias da 9 milliardas euros per las interpresas, ha ditg il minister da finanzas franzos, Michel Sapin.

Il minister da finanzas franzos, Michel Sapin.
Legenda: Il minister da finanzas franzos, Michel Sapin. Keystone

Las 16 milliardas euros che la regenza franzosa vul spargnar, na sa refereschan dentant betg sin las cifras absolutas da quest onn. Ella cumpareglia numnadamain en ses budget per il 2016 co las expensas sa sviluppassan senza mesiras da spargn, per exempel pervia da l’inflaziun. Sch’ins cumpareglia dentant be las cifras absolutas, lura quinta la regenza franzosa da pudair spargnar l’onn proxim be 1,3 milliardas euros en congual cun quest onn.

Deficit duai sa reducir sin 3,3%

Il deficit per il 2016 duai sa reducir sin 3,3 pertschient dal product naziunal brut. Quest onn munta il deficit a 3,8 pertschient. La cumissiun da l’Uniun europeica pretendess in deficit da maximal 3 pertschient dal product naziunal brut. La Frantscha surpassa dapi onns questa marca, ha dentant adina puspè survegnì ina suspensiun da l’UE.

RR novitads 17:00