Siglir tar il cuntegn
cuntegn

Exteriur Franzos èn sa disads vid la smanatscha permanenta

130 persunas han terrorists islamists mazzà la notg dals 13 da november 2015 a Paris. Igl è stà in act da terrur ch'ha mussà a l'Europa ch'i sa tutgar mintg'in. In act ch'ha procurà per in nov sentiment da malsegirtad – in sentiment ch’ha era midà bler en la vita quotidiana.

Anc adina patruglieschan schuldads cun buis per las vias da Paris.
Legenda: Anc adina patruglieschan schuldads cun buis per las vias da Paris. Keystone

Suenter ils attentats a Paris, vesevan ins darar insatgi che serrava ils egls en la metro, malgrà esser stanchels d'in di da lavur stentus. La tema d'ina ulteriura attatga terroristica era memia gronda tenor Stefan Brändle, correspundent liber a Paris. «Ussa, in onn pli tard ed anc adina en stadi d'urgenza, è quai sa midà uschia che la glieud en Frantscha e cunzunt a Paris è sa disada vid ina smanatscha da terrur permanenta».

Betg laschar controllar la tastga fa quitads

Viver cun la smanatscha, veglia dentant era dir, viver cun las mesiras da segirtad prendidas en consequenza da las attatgas avant in onn. Pia che la polizia fa per exempel stedi controllas, che tastgas e satgados vegnan controllads u ch'ils schuldads patruglieschan di per di cun la buis per las vias e las staziuns da la metro. Gronda critica encunter na dat quai betg tenor Stefan Brändle.

Avrir la tastga cura ch'ins va a kino u a far bogn è normal. E las controllas tutgan tar il mintgadi, ch'ins fa ussa schizunt quitads, sch'i manca ina giada la persuna che controllescha la tastga sch'ins porta l'uffant en scolina.
Autur: Stefan Brändlecorrespundent liber

Pronts da laschar tadlar ora

Il desideri per segirtad va schizunt uschè lunsch, ch’ils Franzos èn pronts da laschar tadlar ora els dal stadi – pia che la polizia e las autras autoritads d’anti-terror pon spiunar la communicaziun da ses burgais: «Qua èn cunfins crudads, ch’ins avess avant mai tratga ch’igl pussibel che quels crodan.»