Freddy Mercury avess 70 onns

Ils 5 da settember vess Freddy Mercury festivà ses 70avel onn da naschientscha. En la cultura da pop dal mintgadi è el anc adina preschent.

Laschar ir video «Bohemian Rapsody - emprova da lipsinc da redacturs da RTR»

Bohemian Rapsody - emprova da lipsinc da redacturs da RTR

0:44 min, dals 5.9.2016

Naschì è il chantadur principal da la band englaisa a Sansibar en Tansania. Cun sia vusch ha el intgantà durant decennis ils fans da Queen. Tranter auter ha el cumponì hits sco «Bohemian Rhapsody» e «We Are The Champions». Avant 25 onns. il november 1991, è el mort tras la malsogna SIDA. Freddy Mercury è stà ina da las unfrendas las pli prominentas da la malsogna.

Il video clip da Queen per la chanzun «Bohemian Rhapsody» dal 1975 vala sco emprim video clip da musica insumma. Cunquai ch'il toc ha ina lunghezza da tschintg minutas e 55 secundas èsi vegnì cusseglià a la band da na betg edir el. La single è sa vendida passà tschintg milliuns giadas ed è daventada l'emprim hit numera in da Queen.

La band englaisa è anc adina tranter las 15 bands che han vendì ils pli blers portatuns sin l'entir mund.